Reagon Aleanca për Shqiptarët për zhvillimet në Bashkësinë Fetare Islame

0

Reagim

BDI ashtu siç ka instrumentalizuar çdo institucion tjetër administrativ, gjyqësorin, por edhe arsimin në vend, të njejtën e ka bërë edhe me institucionin e Bashkësise Fetare Islame të Maqedonisë së Veriut, për interesa politike-partiake.

Pohimet e ish kreut të BFI-së për infiltrimin e zyrtarëve të BDI-së në zgjedhje ose ne shkarkim të kreut të këtij institucioni, janë edhe një dëshmi më shumë që BDI në vazhdimësi ka cënuar rolin dhe misionin e BFI-së, duke ndërhyrë politikisht për ti plotësuar objektivat partiake, duke shkelur mbi dispozitat normative të vetë BFI-së, por edhe Kushtetutën e RMV-së, e cila garanton funkisionimin e pavarur të këtij institucioni. Maqedonia Veriore është shtet sekular dhe religjioni është i ndarë nga shteti.

Është po aq e papranueshme, kur ish kreu i BFI-së pranon të bëhet instrument i BDI-së apo i cilës do parti tjetër, për qëllime që nuk ndërlidhen me kompetencat e kreut të BFI-së.

Këto veprime joparimore të ish kreut të BFI-së si dhe të BDI-së, me të drejtë i kanë detyruar besimtarët mysliman që ta humbin besimin tek ky institucion, i cili duhej të ishte i pavarur dhe me kredibilitet të plotë, duke iu shërbyer besimtarëve mysliman, por edhe gjithë qytetarëve, për ruajtjen dhe kultivimin e vlerave njerëzore dhe afirmimin e besimit.

Është koha që ti japim fund manipulimit të BDI-së, që nuk njeh as formë e as mënyrë për të qëndruar në pushtet, duke manipuluar dhe politizuar çdo institucion, madje edhe Bashkësinë Fetare Islame të Maqedonisë së Veriut.

Apelojmë tek të gjithë zyrtarët e BFI-së por edhe tek myftitë e qyteteve në vend, që gjatë procesit të zgjedhjes së kreut të ri të BFI-së mos të lejojnë ndërhyrjen e BDI-së, por edhe të cilit do subjekti tjetër politik.

Njëkohësisht, ti respektojnë të gjitha dispozitat e akteve normative që i përcakton Kushtetuta e BFI-së, të sigurojnë një proces transparent dhe demokratik duke e bërë zgjedhjen më të mirë të Kreut të BFI-së, i cili do t’ia kthente dinjitetin këtij institucioni, i cili i përfaqëson besimtarët mysliman në Maqedoninë e Veriut!

Aleanca për Shqiptarët